«Туберкулездің алдын алу: мамандармен маңызды әңгіме»

Мектебімізде АРУСЭК-тің жетекші маманы Дюселекова Б.К. және ЖБК емханасының жалпы тәжірибелік дәрігері Эрметов Б.У. қатысуымен кездесу өтті. Олар туберкулездің алдын алу тақырыбында әңгіме жүргізіп, бұл қауіпті жұқпалы аурудан сақтану жолдарын түсіндірді.
Кездесу барысында мамандар туберкулездің пайда болу себептері, оның таралу жолдары және уақытылы диагностика жасаудың маңыздылығы туралы айтып берді. Әсіресе, вакцинацияның рөлі, иммунитетті нығайту және жыл сайынғы флюорографиялық тексеруден өтудің қажеттілігіне ерекше назар аударылды. Сондай-ақ, дәрігерлер Манту сынамасының маңызын түсіндірді – бұл балалар мен жасөспірімдерде туберкулезді ерте анықтаудың негізгі әдісі. Мамандар Манту сынамасы екпе емес екенін, оның ағзаның туберкулез қоздырғышымен байланысын көрсетіп, дер кезінде инфекцияны анықтауға көмектесетінін атап өтті.
Оқушылар аурудың алдын алу үшін жеке бас гигиенасын сақтау, салауатты өмір салтын ұстану және қоршаған ортаның тазалығына мән беру керектігін білді. Сондай-ақ, мамандар туберкулездің алғашқы белгілері байқалған жағдайда дереу дәрігерге қаралу керектігін ескертті.
Мұндай іс-шаралар өз денсаулығына жауапкершілікпен қарауға үйретіп, кез келген аурудың алдын алу – оны емдеуден әлдеқайда тиімді екенін еске салады. Біз мамандарға құнды әрі пайдалы ақпарат үшін алғысымызды білдіреміз!
Горбунова А.В.